Sykursýki er alvarlegur sjúkdómur sem hefur þau áhrif á líkamann að sykurmagn í blóðinu er meira en eðlilegt getur talist. Blóðsykurstjórnun líkamans er ferli sem stjórnast af ýmsum þáttum. Kolvetni í mataræðinu brotna niður í sykur sem er mikilvægt brennsluefni fyrir líkamann, fer út í blóðrásina og kallast eftir það blóðsykur. Til þess að hann nýtist eðlilega sem orkugjafi þarf hann að komast inn í frumurnar.
Lykillinn að frumunum er insúlínhormóntið sem framleitt er í briskirtlinum. Ef briskirtillinn framleiðir ekki eðlilegt magn af insúlíni hækkar blóðsykurinn óeðlilega mikið og niðurstaðan er insúlínháð sykursýki. Ef briskirtillinn framleiðir hinsvegar nægt insúlín en það kemst ekki inn í frumurnar er um að ræða insúlínóháða sykursýki. Einnig er til í dæminu að um sé að ræða blöndu beggja.
Of mikill blóðsykur skemmir æðar í taugakerfinu, nýrun, augun og hjartað sem hefur stóraukna hættu í för með sér á hjartaslagi, heilablóðfalli, nýrnasjúkdómum blindu og missi útlima.
Sérfræðingar hafa rifist um bestu leiðina til að takast á við þennan alvarlega sjúkdóm. Undanfarið hafa sumir mælt með lágkolvetnamataræði vegna minni sykurs í blóðrásinni eftir slíkar máltíðir. Því miður eru litlar sem engar rannsóknir sem styðja við þá kenningu og hafa ber í huga að fólk á mjög erfitt með að tileinka sér kolvetnalágt eða kolvetnalaust mataræði. Besta leiðin til að takast á við blóðsykurstjórnun er að léttast eins og komið hefur fram í fjölda rannsókna.
(The New York Times)
