Úrslit Bikarmótsins í fitness 2016

Um helgina fór fram Bikarmótið í fitness í Háskólabíó þar sem um 100 keppendur stigu á svið. Að þessu sinni fór mótið fram á einum degi sem gekk framar vonum ekki síst í ljósi fjölda keppenda.

Þeir voru margir keppendurnir sem fóru brosandi af sviðinu. Fjölmargir nýir keppendur stigu í fyrsta skipti á svið og sérlega ánægjulegt var að sjá þær framfarir sem sumir keppendur sýndu á milli móta.

Teitur Arason með þrennu í fitness karla

Teitur Arason keppti í bæði unglingaflokki og opnum flokki í fitness karla og sigraði báða flokkana og varð þar með einnig heildarsigurvegari í fitness karla.  Fastir á hæla Teits komu þeir Ómar Smári Óttarsson og Gunnar Sigurðsson. Ómar keppti eins og Teitur í unglingaflokki líka en þar varð hann sömuleiðis á annar á eftir Teit sem sýnir hversu sterkur unglingaflokkurinn reyndist á mótinu. Á síðasta Íslandsmóti sigraði Ingi Sveinn Birgirsson bæði unglingaflokkinn og heildarkeppnina eins og Teitur en í þetta skipti hafnaði hann í þriðja sæti sem undirstrikar enn betur hversu öflugir unglingarnir eru orðnir í þessari keppnisgrein.

Una Margrét Heimisdóttir sigraði í fitnessflokki kvenna

Ásrún Ösp Vilmundardóttir sigraði unglingaflokk fitness kvenna og þær Hafdís Björg Kristjánsdóttir og Una Margrét Heimisdóttir sigruðu sína hæðarflokka. Þær Hafdís og Una eru nýkomnar heim af heimsmeistaramótinu í fitness þar sem þær stóðu í baráttu um verðlaunasæti í sínum flokkum og sýndu að styrkleikinn í þessari keppnisgrein er á heimsmælikvarða hér á landi. Ásrún sem sigraði unglingaflokkinn býr sömuleiðis yfir samræmi sem á heima á alþjóðlegum mótum. Í fitnessflokki 35 ára og eldri var það Anna Fedorowich sem stóð uppi sem sigurvegari.

Hrönn sviðsmeistari ein í ólympíufitness

Hrönn Sigurðardóttir var að þessu sinni eini keppandinn í ólympíufitness kvenna. Hún sýndi hinsvegar að venju frábær takta enda erfitt að finna keppendur sem eru færari í sviðsframkomu en Hrönn. Hún er eins og þær Una og Hafdís nýkomin af heimsmeistaramótinu í Póllandi þar sem hún varð jöfn að stigum og keppandinn í sjötta sæti í mjög fjölmennum flokki. Hið einkennilega er að hér á landi hefur keppendafjöldinn í ólympíufitness verið fámennur, en erlendis eru þetta fjölmennustu flokkarnir á eftir módelfitness. Það væri afar gaman að sjá fjölgun í þessum keppnisflokki, ekki síst ef keppendur ná að tileinka sér sviðsframkomu á heimsmælikvarða eins og Hrönn.

Fjölgun að nýju í módelfitness

Um 50 keppendur tóku þátt í módelfitness sem er fjölgun frá Íslandsmótinu. Það var sérlega ánægjulegt að sjá að byrjendaflokkurinn í módelfitness fékk góðar viðtökur en þar kepptu 13 keppendur sem voru allir að stíga sín fyrstu skref á sviði. Það var Margrét Sif Sigurðardóttir sem sigraði byrjendaflokkinn, Ása Hulda Oddsdóttir varð önnur og Ásta Lilja Sólveigardóttir. Í hæðarflokkunum voru það Tanja Rún Freysdóttir, Aðalbjörg Arna Gærdbo, Íris Hrefna Hafsteinsdóttir og Ingibjörg Kristín Gestsdóttir sem sigruðu sína flokka en í heildarkeppninni stóð Aðalbjörg Arna Gærdbo uppi sem sigurvegari.

Jöfn keppni í sportfitness

Viktor Berg varð aftur Bikarmeistari í sportfitness eftir harða baráttu við Jakob Ingason og Aðalstein Stefnisson. Í unglingaflokki mátti sjá miklar framfarir hjá kunnuglegum keppendum en þar var keppnin gríðarlega jöfn en Ásbjörn Árni Ásbjörnsson sigraði.

Fámennur en öflugur flokkur í vaxtarrækt

Einungis fjórir keppendur tóku þátt í vaxtarræktinni. Sigurður Stefán Sigurðsson var einn í flokki 40 ára og eldri og mætti í fantaformi. Í opna flokknum var það David Alexander sem sigraði og sömuleiðis í heildarkeppninni.

Úrslit Bikarmótsins 2016

Sætum 7 og ofar er raðað í stafrófsröð.
Sæti – keppnisflokkur – númer

Fitness karla
1 Teitur Arason 1
2 Ómar Smári Óttarsson 3
3 Gunnar Sigurðsson 2
4 Bent Helgason 4
5 Reynir Ari Þórsson 5

Fitness karla unglingafl.
1 Teitur Arason 8
2 Ómar Smári Óttarsson 7
3 Ingi Sveinn Birgirsson 9
4 Aron Freyr Sveinbjörnsson 6