Besta mataræðið fyrir blóðsykurstjórnun

Talið er að offita tengist insúlínviðnámi, óreglulegum blóðsykri og sykursýki 2. Mataræðið skiptir miklu máli fyrir efnaskiptaferla sem snúa að kolvetnum en undanfarin ár hafa vísindamenn smátt og smátt áttað sig á þýðingu insúlínviðnáms í tengslum við offitu (sjá grein um insúlínviðnám). Rannsókn á fullorðnu offitufólki í átta Evrópulöndum sýndi fram á að prótínríkt mataræði með lágt glýsemíugildi hafði betri áhrif á efnaskipti tengd kolvetnum en mataræði sem innihélt lægra hlutfall prótíns og meira af einföldum kolvetnum.

Glýsemíugildi er notað sem mælikvarði á það hversu hratt ákveðnar fæðutegundir hækka blóðsykur.

Um 1000 manns tóku þátt í rannsókninni en könnuð voru áhrif mataræðis sem innihélt mismunandi hlutfall prótíns, kolvetna og fitu og ennfremur hátt og lágt glýsemíugildi. Þeir sem voru á prótínríku mataræði með lágt glýsemíugildi áttu auðveldast með að þola mataræðið. Ekki var sett hitaeiningaþak í rannsókninni og mátti fólk því borða eins mikið og það vildi óháð því hvaða mataræði það var á.

Niðurstöðurnar þykja sýna fram á að með því að breyta samsetningu mataræðisins var hægt að hafa jákvæð áhrif á efnaskipti líkamans, jafnvel þrátt fyrir að hitaeiningafjöldinn væri ekki takmarkaður.

(Diabetes Metabolic Research Reviews, vefútgáfa 19. Maí, 2011)