Hægt er að mæla magn kortisól-streytuhormónsins í hári. Hið einkennilega er að þeir sem mælast með mesta magnið af þessu hvimleiða hormóni eru þeir sem eru feitastir, með mesta mittismálið og hafa lengi barist við offitu. Það var Sarah Jackson við Læknaháskólann í London sem sýndi fram á samhengi á milli kortisóls og offitu í nýlegri rannsókn.
Kortisól-hormónið eykur einnig framleiðslu insúlín-hormónsins sem hækkar blóðþrýsting og stuðlar að fitusöfnun á kviðnum, sérstaklega í kringum mikilvægustu líffærin eins og hjarta og lifur. Kortisól hefur einnig þau áhrif á suma að auka matarlyst en þau áhrif eru breytileg eftir fólki. Áhrif þessa hormóns eru flókin því það virðist stuðla að léttingu hjá sumum en mikilli þyngingu hjá öðrum.
Það er mjög persónubundið hversu mikið kortisól myndast. Dauðsföll, skilnaður eða fjárhagsáhyggjur geta stuðlað að streytu og álagi sem veldur vanlíðan. Vanlíðanin veldur því að sumir sækja huggun í mat og stórauka neysluna á meðan aðrir missa alla matarlyst og horast niður. Við bregðumst mismunandi við streytu enda eru engar tvær persónur nákvæmlega eins.
(Obesity, 25: 539-544)