Nýtt efni er að ná athygli líkamsræktarfólks þessa dagana. Það ættu þó fleiri að sperra augu og eyru en þeir sem eru iðnir í líkamsræktinni. Quercetin virðist nefnilega búa yfir ýmsum eiginleikum sem verða að teljast eftirsóknarverðir fyrir allan almenning ef marka má þær vísbendingar sem komið hafa fram.
Quercetin virðist efla heilbrigði á ýmsan hátt og efla hvatberahluta frumna sem gefur meira þol.
Quercetin er sindurvari sem er að finna í eplahýði, bláberjum, kirsuberjum, lauk, te og rauðvíni svo eitthvað sé nefnt. Mark Davis og félagar við háskólann í Suður Karolínu endurskoðuðu ýmsar rannsóknir og bentu á að quercetin drægi úr bólgum, efldi ónæmiskerfið, örvaði andlega frammistöðu, verndaði hjartað gagnvart kransæðasjúkdómum og kæmi í veg fyrir niðurbrot prótína. Ekki amalegar fullyrðingar þar á ferð. Þetta fullyrða Mark Davis og félagar engu að síður. Og fullyrðingarnar halda áfram. Quercetin minnkaði líkurnar á kvefi, bætti frammistöðu þrautþjálfaðra reiðhjólamanna og stækkaði hvatberasvæðið (orkusvæðið) í rottufrumum. Þetta sýndi samantekt þeirra félaga. Það virkar líka á svipaðan hátt og koffín og eykur þannig andlega og líkamlega frammistöðu. Út frá sjónarhóli íþróttamanna er hugsanlegt að quercetin komi í veg fyrir ofþjálfun, styrki ónæmiskerfið og hafi almenn heilsubætandi áhrif. Talið er óhætt að neyta þess sem bætiefnis en hafa ber í huga að það safnast saman í vefjum líkamans og fátt er vitað um aukaverkanir vegna langvarandi notkunar eða stórra skammta.
(Current Sports Medicine Reports, 8: 206-213, 2009)