Það var árið 1980 sem bandaríska landbúnaðarráðuneytið gaf fyrst út svonefnda ráðlagða dagsskammta (RDS) hinna ýmsu næringarefna. Aðrar þjóðir, þar á meðal við Íslendingar öpuðum eftir þeim og lögðum línurnar í þeim anda sem gert var hið vestra. Á þessum tíma var offita ekki teljandi vandamál miðað við hvað hún er í dag, en um 15% flokkuðust í offituflokkinn á móti 33% árið 2011 í Bandaríkjunum. Offita hafði verið nokkuð stöðug um 15% á tímabilinu 1960-1980 en tók síðan að hækka jafnt og þétt.
Bæði þá og nú hefur alltaf verið mælt með minni fituneyslu, minni neyslu á mettuðum fitusýrum, kólesteróli og viðbættum sykri og salti. Aftur á móti var mælt með aukinni neyslu á kornmeti, ávöxtum og grænmeti. Í ritstjórnargrein Nutrition tímaritsins eru bornar fram ásakanir um að ráðleggingar um samsetningu fæðunnar hafi sprottið af hagsmunagæslu bænda og framleiðenda en ekki verið tilkomnar vegna umhyggju fyrir heilsu almennings. Í greininni er áréttað að vísindamenn ættu að leggja áherslu á sannanir og rökstuðning fyrir tilstilli rannsókna þegar ákvarðanir um fæðusamsetningu eru teknar. Annað sé ekki til þess fallið að skapa traust almennings þegar grannt er skoðað.
(Nutrition, 27: 1078-1079, 2011)